News

Skiweekend 12. u 13. Jänner 2019 Elsigen-Metsch

Am 12. Jänner am Morge früech, si es paar verwägeni Seele am Bahnhof zäme cho für sech a däm Wuchenend sportlech z betätige. Es het sogar di Tage vorhär tou Neuschnee gäh. Me het sech auso gwüss chönne fröie uf gueti Pisteverhältnis. We da nid di üngwüssi Wätterprognose wäri gsi. Nach churzer Beratig übere Fahrtwäg isch me Richtig Oberland ufbroche. Trotz de Skirenne ds Adelboden si mir ohni Stou a üses Ziel cho.

Im Gasthuus Höchst, wo mir am Abe de o gnächtiget hei, isch nüt angersch gsi weder aube oscho. Das heisst, me chunnt zur Türe i, u wird vom Gaststubetraktor im Pyjama begrüesst u de no grad bewirtet. We das nume guet chunnt…
D Anna het üs d Skibillette organisiert, für das mir ohni lang z verwile uf d Latte oder Brätt  hei chönne stah. Es isch nid aune so pressant gsi. Me het no es Käfeli meh gno.
Itz aber los uf Piste. Troumhaft! Pulver guet.
Aber es isch nid aune so guet gange, da di cheibe Schueh eifach nid hei wöue höre passe. Me het sech du haut ar Wirtschaftskund güetig ta.
Zoberst obe im Skigebiet het zu üsem Erstune d Sunne gschune u mir hei hurtig e Blick uf das wunderbare Wulchemeer u Panorama chönne erhasche, bevor dr Nebel wieder d Überhang gwunne het. Mi isch du ga z Mittag inäh u het ab auem parliere bau verpasst, dass es uf zmau uftah het. Prächtig! Wulchelos u stahlblau. Me isch ume uf Piste. Bi de läng zognige Schwüng  het me no dr Räschte vor Bruschthaar-Diskussion verdouet.
Es isch cho wies muess cho. Es Gjufu für übere a anger Hang u de no ufe Lift.  Für das me de ja no id Schneekurfebar i ds Apéro cha. Es heis fasch aui gschafft. Aber verpasst het niemmer öppis. Es isch nämlech zünftig chaut worde, da dr Nebel wieder isch füre cho.
Gly si mir Richtig Nachtlager gfahre. Gseh het me igentlech nüt meh, aber ds Ziu hei aui gfunge. Itz isch ds Après-Ski erscht richtig losgange u zwar ir Restaurant eigete Bar. Üsi fründlechi Barmaid het ds Pyjama ungerdessi sogar gäge normali Chleider ituschet gha. Ds Füüröfeli isch tou igheizt gsi, dass me sech ume het chönne erwärme.
Dr nächscht Zwüschestopp: Nachtässe. Ds Fondue isch hüür zu üsem Erstune würklech guet gsi u es het ou für aui gnue gha. Da ds Wätter füre e Sunntig nid het guet usgseh, het me sech usgibig em Usgang chönne widme. Nahdisnah si aui ids Huli. Bis uf Drei. Gschider si o die Drei nid worde, aber schöni Musig hei si no dörfe lose. Het doch jede si Wunschsong dörfe wähle. U zu auem Überfluss, hei Zwe no e CD mit persönlecher Widmig vor Barmaid übercho!
Gwüss bau früecher weder speter isch es nache gsi für ds Morgeässe. Me isch sech einig worde, dass das am Sunntig nüt wird mit Skifahre. Auso het me zämepackt u isch bezyte richtig Schwarzenburg ufbroche u de o acho.

Merci Anna für d Organisation, es isch es glungnigs Wuchenend gsi!!

Für d Skifahrergruppe
Pesche